Sas sociedades de su passau cheriant àere a fundale s’amore o sa zustìssia. Sa nostra hat a fundale s’ódiu. In su mundu nostru non b’hant a èssere emossiones, foras de sa pauria, de s’arràbiu, de su bervore e de s’auto-umiliatzione. Totu s’àtteru hat èssere distruiu ... totu. Semus zai iscontzande sas abitùdines mentales chi furint abbarradas vivas finas dae sos tempos innantis de sa Rivolutzione. Amus secau cada ligàmene intre de sos fizos e de babbos e mammas, intre de un’ómine e de s’àtteru, intre de s’ómine e de sa fémina. Nemos hat prus su corazu de si fidare de sa muzere o de unu picinnu o de un’amicu. Ma in su venidore non b’hant a èssere nen muzeres nen amicos. Sos picinnos hant a èssere iscropaos dae sa mamma derettu cando naschent, gai ettotu comente si che picant sos ovos a una pudda. S’istintu sessuale hat a èssere irradichinau. A fàchere fizos hat a èssere una formalidade de cada annu, comente s’arrennovu de una tèssera po su ratzionamentu. Amus a abolire s’orgasmu. Sos neuròlogos nostros sunt zai triballande po arribare a cussu. Non b’hat a èssere lealtade, si non sa lealtade a reguardu de su Partzidu. Non b’hat a èssere amore, si non s’amore po su Frade Mannu. Non b’hat a èssere errisu, si non s’errisu de triunfu supra de s’inimicu vintu. Non b’hat a èssere arte, nen litteradura nen issièntzia. Cando amus a èssere onnipotentes, non amus a tènnere prus bisonzu de s’issièntzia. Non b’hat a èssere distinsione intre de su dechidore e de sa lezesa. Non b’hat a èssere disizu de imparare nen gosu de abbarrare in vida. (Vortada in limba sarda e glossàriu de Gonàriu Franciscu Sedda)